Bomberi vushtrrias, Drilon Fazliu i bashkohet Llapit Evropian

Podujevë, 21 maj 2021 – Kapiteni i Vushtrrisë, Drilon Fazliu është bashkuar me Llapin. Sulmuesi 20 vjeçar nënshkruajti kontratë 3 vjeçare me Llapin dhe përforcon radhët e skuadrës në prag të ndeshjeve ndërkombëtare. Fazliu ishte i piketuar nga shumë skuadra kosovare, por zgjedhja e tij ishte Llapi dhe padyshim që edhe klubi është i kënaqur që pas një kohe të vëzhgimit arriti t’i siguroj shërbimet e sulmuesit vushtrrias.
Drilon Fazliu, 20 vjeç, i lindur më 17 nëntor 2000, i gjatë 1,77 m është sulmues qendre. Përveç pozitës së sulmuesit të qendrës, ai mund të luaj edhe si sulmues i krahut të majtë dhe të djathtë. Ka luajtur në Vushtrri. Në edicionin e fundit, Fazliu kishte realizuar 7 gola, ndërsa sa ishte Vushtrria pjesë e Superligës në edicionin 2019/20 kishte realizuar 10 gola, 8 në kampionat dhe 2 në Kupë.
Fazliu: Privilegj të vesh fanelën e Llapit, krenar që do punoj me trajnerin Tahir Batatina

“Është ndjenjë e veçantë të jesh pjesë e fituesit të Kupës dhe skuadrës që do të marr pjesë në garat evropiane. Kisha oferta nga shumë skuadra tjera kosovare, por zgjedhja ime me zemër ishte për Llapin. Llapi njihet se u jep hapësirë të rinjëve, andaj nuk kisha fare problem ta bëja zgjidhjen time. Mendoj që do të kemi sukses në garat ndërkombëtare dhe të kalojmë sa më shumë raunde. Nga Llapi pres të kaloj në Evropë, por mendjen njëherë e kam vetëm tek Llapi. Pa dyshim ndjenjë e mirë të punoj me trajnerin Tahir Batatina. Trajneri është motivues dhe përkrahës i madh për të rinjët dhe pres që me punë dhe angazhim ta shpërblej mundësinë e dhënë nga ai që të jem pjesë e klubit me histori, Llapit”, përfundoi për faqen zyrtare, sulmuesi vushtrrias, Drilon Fazliu në ditën e prezantimit të tij si futbollist i ri i Llapit.

Leave a Reply

Your email address will not be published. Required fields are marked *